US-Russia: అమెరికాకు చెందిన ఒక సైనిక విమానం మంగళవారం రష్యాలోని వృుకోవో ఎయిర్పోర్టులో ల్యాండ్ కావడం చర్చనీయాంశంగా మారింది. ఉక్రెయిన్ యుద్ధం జరుగుతున్న వేళ యూఎస్ విమానం రష్యాకు ఎందుకు వెళ్లిందనే ప్రశ్నలు వస్తున్నాయి. ఉక్రెయిన్ యుద్ధం నేపథ్యంలో అమెరికా, రష్యాల మధ్య సంబంధాలు ఉద్రిక్తంగా ఉన్న సంతతి తెలిసిందే.
ఫ్లైట్ ట్రాకింగ్ వెబ్సైట్ ఫ్లైట్రాడార్ ప్రకారం.. ఈ విమానం బోయింగ్ సీ-17 గ్లోబ్మాస్టర్ 3 అయి ఉండొచ్చని తెలుస్తోంది. ఈ విమానం ప్రత్యేకంగా యూఎస్ వైమానికదళం ఉపయోగించే భారీ సైనిక రవాణా విమానం. సైనిక సిబ్బంది, సైనిక పరికరాలు, వాహనాలను సుదూర ప్రాంతాలకు తరలించేందుకు దీనిని ఉపయోగిస్తారు. ఇది లాట్వియా రాజధాని రిగా నుంచి మాస్కో వెళ్లింది. విమానం ఉదయం సుమారు 8:50 గంటలకు రిగా నుంచి బయలుదేరి, 10 గంటల తర్వాత మాస్కోలో ల్యాండ్ అయింది.
అయితే, ఈ విమానంలో ఎవరు వెళ్లారనే దానిపై స్పష్టత లేదు. అమెరికా, రష్యా ప్రభుత్వాలు ఈ విమానంపై ఎలాంటి అధికారిక ప్రకటన చేయలేదు. ఈ విమానం ఆగస్టు 23న రిగాకు చేరుకుంది. అంతకుముందు ఇది అమెరికాలోని క్యాంప్ స్ప్రింగ్ నుంచి బయలుదేరినట్లు తెలుస్తోంది. ఇక్కడే అమెరికా కీలక సైనిక స్థావరమైన ఆండ్రూ ఎయిర్ ఫోర్స్ బేస్ ఉంది. దీనిక అమెరికా అధ్యక్షుడు ఉపయోగించే ఎయిర్ఫోర్స్ వన్తో ఈ స్థావరానికి సంబంధం ఉంది.
ఈ విమానం రష్యాకు వెళ్లడం చూస్తే అమెరికాకు చెందిన ఉన్నతాధికారి పర్యటన అయి ఉండొచ్చనే అనుమానాలు వస్తున్నాయి. ప్రస్తుతం, రెండు దేశాల మధ్య సంబంధాలు సున్నితంగా ఉన్నాయి. ఇలాంటి సమయంలో ఒక అమెరికా సైనిక విమానం రష్యా రాజధానిలో ల్యాండ్ కావడం చూస్తే అంతర్జాతీయంగా ఆసక్తి పెరుగుతోంది.
