TGEAPCET 2026: తెలంగాణ రాష్ట్ర ఇంజనీరింగ్, అగ్రికల్చర్ అండ్ ఫార్మసీ కామన్ ఎంట్రన్స్ టెస్ట్ (TGEAPCET)-2026 రెండో విడత ప్రవేశాల కౌన్సిలింగ్ షెడ్యూల్ను సాంకేతిక విద్యాశాఖ విడుదల చేసింది. రేపటి నుండి (జూలై 17, 2026) ఈ రెండో విడత అడ్మిషన్ల ప్రక్రియ అధికారికంగా ప్రారంభం కానుంది. మొదటి విడత కౌన్సిలింగ్ ముగిసిన అనంతరం ఖాళీగా ఉన్న స్థానాలను ఈ విడత ద్వారా భర్తీ చేయనున్నారు.
ముఖ్యమైన తేదీల వివరాలు:
జూలై 17: ఆన్లైన్ ద్వారా ప్రాసెసింగ్ ఫీజు చెల్లింపు, సర్టిఫికేట్ వెరిఫికేషన్ కోసం స్లాట్ బుకింగ్ చేసుకునేందుకు అవకాశం కల్పించారు.
జూలై 18: స్లాట్ బుక్ చేసుకున్న అభ్యర్థులకు హెల్ప్ లైన్ కేంద్రాలలో ధృవపత్రాల పరిశీలన (Certificate Verification) జరుగుతుంది.
జూలై 18 నుండి 19 వరకు: అర్హులైన అభ్యర్థులు తమకు నచ్చిన కాలేజీలు, కోర్సుల ప్రాధాన్యత క్రమంలో వెబ్ ఆప్షన్లు నమోదు చేసుకోవచ్చు.
జూలై 22: విద్యార్థుల మెరిట్, వెబ్ ఆప్షన్ల ఆధారంగా రెండో విడత తాత్కాలిక సీట్ల కేటాయింపును (Allotment) ప్రకటిస్తారు.
మొదటి విడత కౌన్సిలింగ్ ముగిసిన తర్వాత భారీ సంఖ్యలో సీట్లు మిగిలిపోయాయి. అధికారులు వెల్లడించిన గణాంకాల ప్రకారం మొదటి విడతలో సీట్లు పొంది, నిర్ణీత గడువులోగా కాలేజీలలో రిపోర్ట్ చేయని అభ్యర్థుల సంఖ్య 19,325 కాగా.. మొదటి విడత కౌన్సిలింగ్ ప్రక్రియ ముగిసిన తర్వాత నేరుగా మిగిలిపోయిన ఖాళీ సీట్ల సంఖ్య 8,162. ఈ రెండు విభాగాలూ కలిపి రెండో విడత కౌన్సిలింగ్లో అభ్యర్థులకు అందుబాటులో ఉన్న మొత్తం 27,487 సీట్లు ఉన్నాయి.
