పంజాబ్ కాంగ్రెస్‌లో కీలక మార్పు చోటుచేసుకుంది. పంజాబ్ ప్రదేశ్ కాంగ్రెస్ కమిటీ (PPCC) నూతన అధ్యక్షుడిగా పర్గత్ సింగ్‌ను కాంగ్రెస్ నియమించింది. శుక్రవారం అమరీందర్ సింగ్ రాజా వరంగ్ తన పదవికి రాజీనామా చేసిన కొద్ది నిమిషాలకే ఈ నియామకం జరిగింది.
ఎవరీ పర్గత్ సింగ్?
పర్గత్ సింగ్ మాజీ భారత హాకీ కెప్టెన్, ఒలింపియన్. క్రీడా రంగంలో తన కెరీర్ తర్వాత రాజకీయాల్లోకి వచ్చిన ఆయన పంజాబ్‌లో క్రీడలు, విద్యాశాఖ మంత్రిగా కూడా పనిచేశారు. ప్రస్తుతం జలంధర్ కాంట్ నియోజకవర్గం నుంచి పంజాబ్ అసెంబ్లీకి ప్రాతినిధ్యం వహిస్తున్నారు.
రాజా వరంగ్ స్థానంలో..
పంజాబ్ కాంగ్రెస్ అధ్యక్షుడిగా నాలుగేళ్లకు పైగా కొనసాగిన అమరీందర్ సింగ్ రాజా వరంగ్ ఇటీవల పదవికి రాజీనామా చేశారు. శుక్రవారం ఢిల్లీలో కాంగ్రెస్ నేత రాహుల్ గాంధీని కలిసి తన రాజీనామా లేఖను సమర్పించారు. పంజాబ్‌లో పార్టీ ఎదుర్కొంటున్న సవాళ్లు, బలాలు, రాష్ట్రంలోని రాజకీయ పరిస్థితులపై రాహుల్ గాంధీతో చర్చించినట్లు వరంగ్ తెలిపారు. రాజీనామా అనంతరం పార్టీకి ఎప్పుడు తన సేవలు అవసరమైనా అందుబాటులో ఉంటానని వరంగ్ చెప్పారు.
పంజాబ్‌లో 2027లో అసెంబ్లీ ఎన్నికలు జరగనున్న నేపథ్యంలో కాంగ్రెస్ రాష్ట్ర నాయకత్వంలో ఈ మార్పు చోటుచేసుకుంది. పంజాబ్ కాంగ్రెస్‌లో కొంతకాలంగా కొనసాగుతున్న అంతర్గత విభేదాల నేపథ్యంలో రాజా వరంగ్ రాజీనామా చేశారు. అంతకుముందు పంజాబ్ కాంగ్రెస్ వ్యవహారాల ఇన్‌చార్జ్‌గా ఉన్న భూపేశ్ బఘేల్ స్థానంలో సచిన్ పైలట్‌ను నియమించారు.
