Divya Mittal: 2027 ఉత్తర్ ప్రదేశ్ అసెంబ్లీ ఎన్నికల ముందు మాజీ ఐఏఎస్ అధికారిణి దివ్యా మిట్టల్ సంచలనంగా మారారు. ఆమె రాజకీయాల్లో చేరుతున్నట్లు వార్తలు వస్తున్నాయి. ఈమెను తమ పార్టీలో చేర్చుకోవాలని కాంగ్రెస్, సమాజ్‌వాదీ పార్టీ(ఎస్పీ)లు పోటీ పడుతున్నట్లు తెలుస్తోంది. దివ్యా మిట్టల్ తాను ఏ రాజకీయ పార్టీలో చేరబోనని స్పష్టం చేశారు, ప్రజలతో కలిసి తన రాజకీయ ప్రయాణాన్ని ప్రారంభిస్తానని ప్రకటించారు.
2013 బ్యాచ్‌కు చెందిన యూపీ కేడర్ ఐఏఎస్ అధికారి దివ్య మిట్టల్, 13 ఏళ్ల సివిల్ సర్వీస్‌కు ఆగస్టు 30న రాజీనామా చేశారు. ఆ తర్వాత నుంచి ఆమె రాజకీయాల్లోకి వస్తారనే ప్రచారం జరుగుతోంది. సెప్టెంబర్ 29న ఆమె ఓ వీడియోలో తర్వాతేంటి అనే ప్రశ్నకు తన సమాధానం ‘‘రాజకీయాలు’’ అని ప్రకటించారు. పార్టీతో కాదు ప్రజలతో కలిసి రాజకీయాలు చేస్తాను అని ఆమె వ్యాఖ్యానించడం రాజకీయంగా సంచలనంగా మారాయి.
ఇదిలా ఉంటే, ఆమె కాంగ్రెస్‌లో చేరుతున్నట్లు ప్రచారం జరుగుతోంది. ఇటీవల రాహుల్ గాంధీతో రహస్యంగా భేటీ అయ్యారనే వార్తలు కూడా వినిపించాయి. ఇదే కాకుండా రాజా భయ్యాకు చెందిన జనసత్తా దళ్ లోక్‌తాంత్రిక్ పార్టీ పోస్టర్‌లో ఏకంగా దివ్యా మిట్టల్ ఫోటో కనిపించడం సంచలనంగా మారింది. యూపీలో దివ్యా మిట్టల్‌కు పాజిటివ్ ఇమేజ్ ఉండటంతో తమ పార్టీలో చేర్చుకుని పోటీలో నిలబెట్టాలని ఎస్పీ, కాంగ్రెస్ భావిస్తున్నాయి.
