జర్మనీలోని బోఖుమ్ నగరంలో ఘోర అగ్నిప్రమాదం చోటుచేసుకుంది. ఓ నివాస భవనంలో చెలరేగిన మంటల్లో ముగ్గురు భారతీయులు ప్రాణాలు కోల్పోగా.. మరో ఐదుగురు గాయపడ్డారు. ఈ ఘటనకు సంబంధించి అదే భవనంలో నివసిస్తున్న 41 ఏళ్ల రొమేనియా దేశస్థుడిని పోలీసులు హత్య అనుమానంతో అరెస్ట్ చేశారు. అగ్నిప్రమాదం ప్రమాదవశాత్తు జరిగిందా? లేక ఉద్దేశపూర్వకంగా నిప్పంటించారా? అనే కోణాల్లో అధికారులు దర్యాప్తు చేస్తున్నారు.
స్థానిక మీడియా కథనాల ప్రకారం.. ఈ ప్రమాదంలో 25, 27 ఏళ్ల వయసున్న ఇద్దరు మహిళలు, 26 ఏళ్ల యువకుడు మరణించారు. వీరంతా భారతీయులు. మంటలను అదుపు చేసేందుకు వచ్చిన అగ్నిమాపక సిబ్బంది భవనం రెండో అంతస్తులోని ఓ అపార్ట్‌మెంట్‌లో మృతదేహాలను గుర్తించారు. ఈ ఘటనలో మరో ఐదుగురు పొగ పీల్చడంతో అస్వస్థతకు గురయ్యారు. కిత్స కోసం బోఖుమ్‌లోని ఆసుపత్రులకు తరలించారు. అయితే గాయపడిన వారి జాతీయతకు సంబంధించిన వివరాలను స్థానిక మీడియా వెల్లడించలేదు. అగ్నిప్రమాదానికి సంబంధించి పోలీసులు అదే భవనంలో నివసించే 41 ఏళ్ల రొమేనియా దేశస్థుడిని అదుపులోకి తీసుకున్నారు. హత్య కోణంలో అరెస్ట్ చేసినట్లు నివేదికలు పేర్కొన్నాయి.
ప్రాథమిక దర్యాప్తులో భవనంలో సాంకేతిక లోపం కారణంగా మంటలు చెలరేగినట్లు కనిపించడం లేదని అధికారులు భావిస్తున్నారు. దీంతో ఎవరో ఉద్దేశపూర్వకంగా నిప్పంటించి ఉండవచ్చనే అనుమానంతో దర్యాప్తు చేపట్టారు. అయితే మంటలు కావాలనే పెట్టారా? లేక ప్రమాదవశాత్తు చెలరేగాయా? అనే విషయంపై దర్యాప్తు జరుగుతోంది. ముగ్గురు భారతీయుల ప్రాణాలను బలిగొన్న ఈ ఘటనపై జర్మనీ పోలీసులు దర్యాప్తు కొనసాగిస్తున్నారు. అగ్నిప్రమాదానికి అసలు కారణం, అరెస్టయిన వ్యక్తి పాత్ర, మంటలు ఉద్దేశపూర్వకంగా పెట్టారా అనే అంశాలపై స్పష్టత రావాల్సి ఉంది.
