Srisailam Reservoir: శ్రీశైలం జలాశయం అరుదైన ఘనతను సొంతం చేసుకుంది. ప్రతిష్ఠాత్మక వరల్డ్ బుక్ ఆఫ్ రికార్డ్స్‌లో శ్రీశైలం జలాశయానికి చోటు లభించింది. ఈ గుర్తింపుతో దేశంలో ఈ ఘనత సాధించిన తొలి ప్రాజెక్టుగా శ్రీశైలం జలాశయం నిలిచింది. ఈ సందర్భంగా సంస్థ సౌత్ రీజినల్ జాయింట్ సెక్రటరీ ఇలియాజర్.. శ్రీశైలం ఎమ్మెల్యేకు, ఇరిగేషన్ అధికారులకు సర్టిఫికెట్లను అందజేశారు.
దక్షిణాసియాలో మరే ప్రాజెక్టులోనూ లేని విధంగా శ్రీశైలం జలాశయంలో 60 అడుగుల వెడల్పు, 55 అడుగుల ఎత్తు కలిగిన గేట్లు ఉండటం ఈ గుర్తింపునకు ప్రత్యేకతగా నిలిచింది. జలాశయం నిర్మాణం, దాని సాంకేతిక సామర్థ్యం, వరదలను తట్టుకునే పటిష్టతకు ఈ ఘనత నిదర్శనంగా నిలుస్తోంది. 2009లో వచ్చిన భారీ వరదల సమయంలో శ్రీశైలం జలాశయం రికార్డు స్థాయిలో 25.4 లక్షల క్యూసెక్కుల వరద ప్రవాహాన్ని తట్టుకుని పటిష్టంగా నిలిచింది. ఆ సమయంలో జలాశయం ప్రదర్శించిన సామర్థ్యం, నిర్మాణ పటిష్టత దాని ప్రత్యేకతను చాటిచెప్పాయి. ఈ సందర్భంగా శ్రీశైలం ఎమ్మెల్యే ఆనాటి డ్యామ్ నిర్మాణంలో కీలక పాత్ర పోషించిన ఇంజనీర్ల కృషిని కొనియాడారు. జలాశయానికి వరల్డ్ బుక్ ఆఫ్ రికార్డ్స్‌లో గుర్తింపు లభించేలా కృషి చేసిన ఇరిగేషన్ అధికారులను అభినందించారు. ఈ అంతర్జాతీయ గుర్తింపు శ్రీశైలం జలాశయానికి మరింత ప్రత్యేకతను తీసుకొచ్చిందని పేర్కొన్నారు.
