సౌదీ అరేబియా రాజధాని రియాద్‌లోని విమానాశ్రయం దగ్గర మరోసారి భారీ శబ్దం వినిపించడంతో కలకలం నెలకొంది. ఈ ఘటన నేపథ్యంలో విమానాశ్రయంలో అప్రమత్తత ప్రకటించి, ప్రయాణికులను సురక్షిత ప్రాంతాలకు తరలించినట్లు సమాచారం. కొన్ని విమానాలను ఇతర విమానాశ్రయాలకు దారి మళ్లించినట్లు తెలుస్తోంది.
భారీ శబ్దం వినిపించడంతో విమానాశ్రయ అధికారులు, భద్రతా సిబ్బంది అప్రమత్తమైనట్లు సమాచారం. ప్రయాణికుల భద్రతను దృష్టిలో ఉంచుకుని వారిని అక్కడి నుంచి తరలించినట్లు నివేదికలు వెల్లడించాయి. విమానాల రాకపోకలపైనా ప్రభావం పడినట్లు తెలుస్తోంది. అయితే భారీ శబ్దం ఎందుకు వినిపించింది? దాని వెనుక పేలుడు ఉందా? లేక మరేదైనా కారణమా? అనే విషయాలపై ఇంకా స్పష్టత రావాల్సి ఉంది. ఘటనకు సంబంధించి అధికారికంగా పూర్తి వివరాలు వెల్లడైతేనే అసలు కారణం తెలిసే అవకాశం ఉంది.
గత కొద్దిరోజులుగా సౌదీ లక్ష్యంగా హౌతీలు దాడులు చేస్తున్నారు. సౌదీ ఎదురు దాడి చేస్తున్నా.. హౌతీలు మాత్రం దూసుకొస్తున్నారు. ప్రస్తుతం పశ్చిమాసియాలో తీవ్ర ఉద్రిక్తతలు కొనసాగుతున్నాయి. ఇప్పటికే ఇరాన్-అమెరికా యుద్ధంతో చమురు, గ్యాస్ సంక్షోభం కొనసాగుతుండగా.. ఇప్పుడు కొత్తగా సౌదీ-హౌతీల ఘర్షణతో ఏం తలనొప్పి రానుందోనని భయాందోళన చెందుతున్నారు.
