NASA: అమెరికా అంతరిక్ష పరిశోధనా సంస్థ నాసాకు చెందిన ‘నీల్ గెహ్రెల్స్ స్విఫ్ట్ అబ్జర్వేటరీ’ స్పేస్ టెలిస్కోప్ భూమివైపు దూసుకొస్తోంది. సుమారు 1500 కిలోల బరువున్న ఈ అంతరిక్ష టెలిస్కోప్ నవంబర్ 04న భూ వాతావరణంలోకి ప్రవేశించి కూలిపోనుంది. ఇలా కూలేటప్పుడు చాలా భాగాలు భూ వాతవరణంలోని ఘర్షణ కారణంగా కాలిబూడిద అవుతాయి. అయితే, కొన్ని భారమైన శకలాలు మాత్రం భూమిపై పడే అవకాశం ఉంది.
క్రాష్ జోన్‌లో భారత్..
ఇదిలా ఉంటే, ఈ శాటిలైట్ టెలిస్కోప్ కూలిపోయే క్రాష్ జోన్ పరిధిలో భారత్ కూడా ఉంది. ముంబై, హైదరాబాద్, బెంగళూర్, చెన్నై వంటి నగాలు ఈ పరిధిలో ఉన్నట్లు నివేదికలు వెల్లడించాయి. నాసా అంచనాల ప్రకారం, నవంబర్ 4న అమెరికా తూర్పు కాలమాన ప్రకారం తెల్లవారుజామున 3.30 గంటల సమయంలో(భారత కాలమానం ప్రకారం మధ్యాహ్నం 2 గంటలకు) ఈ టెలిస్కోప్ భూ వాతావరణంలోకి ప్రవేశించే అవకాశం ఉంది. నాసా మిషన్ చీఫ్ సైంటిస్ట్ బ్రాడ్ సెంకో మాట్లాడుతూ.. ఆఫ్రికా, ఆస్ట్రేలియా, భారత్, ఆగ్నేయాసియా, మధ్య, దక్షిణ అమెరికాలోని కొన్ని ప్రాంతాలు ఈ టెలిస్కోప్ తిరిగి రీఎంట్రీ పరిధిలో ఉన్నాయని తెలిపారు.
ఈ పరిధి దక్షిణ అక్షాంశం 20.6 డిగ్రీల నుంచి ఉత్తర అక్షాంశం 20.6 డిగ్రీల మధ్య విస్తరించి ఉంది. భారత్ విషయానికొస్తే.. పశ్చిమ తీరంలోని డామన్‌ నుంచి తూర్పు తీరంలోని ఒడిశా రాష్ట్రం కటక్‌ వరకు దక్షిణంగా ఉన్న ప్రాంతాలు ఈ పరిధిలోకి వస్తాయి. దీంతో ముంబై, హైదరాబాద్, బెంగళూరు, చెన్నై నగరాలు ఈ భౌగోళిక పరిధిలో ఉన్నట్లు పేర్కొన్నారు. అయితే, టెలిస్కోప్ మొత్తం బరువు 1500 కిలోలు అయితే, దీంట్లో 100 కిలోల విడిభాగాలు మాత్రమే భూ వాతావరణంలోకి ప్రవేశించే అవకాశం ఉన్నాయి. చాలా వరకు సముద్రంలోనే పడే ఛాన్స్ ఉంది.
నాసా మిషన్ విఫలం తర్వాత..
2004 నవంబర్ 20న అంతరిక్షంలోకి ప్రయోగించిన ఈ టెలిస్కోప్ .. అనుకున్న దాని కన్నా ఎక్కువ కాలం పనిచేసింది. దాదాపు 22 ఏళ్ల పాటు అంతరిక్ష పరిశోధనలు చేసిన ఈ టెలిస్కోప్, 2000కు పైగా గామా కిరణాల విస్పోటనాలను, 1400 సూపర్ నోవాలను పరిశీలించింది. అయితే, దీర్ఘకాలంగా సేవలందించడంతో దీని కక్ష్య క్రమంగా క్షీణించింది. దీనిని సరైన కక్ష్యలో పెట్టేందుకు నాసా చేపట్టిన మిషన్ కూడా విఫలం కావడంతో, ఇది భూమి పై కూలడం అనివార్యంగా మారింది.
