భారత క్రికెట్ జట్టు సహాయక కోచ్ రియాన్ టెన్ డోషే.. స్టార్ స్పిన్నర్ కుల్దీప్ యాదవ్ ప్రస్తుత ఫామ్పై కీలక వ్యాఖ్యలు చేశారు. అతని తాత్కాలిక ఫామ్ లేమిపై తాము పెద్దగా ఆందోళన చెందడం లేదని చెబుతూనే, జట్టులో ఉన్న విపరీతమైన పోటీని తట్టుకుని నిలబడాలంటే కుల్దీప్ త్వరగా తన పాత లయను అందుకోవాల్సి ఉంటుందని స్పష్టం చేశారు. జనవరి 2025 నుంచి కుల్దీప్ 15 వన్డేల్లో 22 వికెట్లు, అలాగే 14 టీ20ల్లో 22 వికెట్లు పడగొట్టాడు. కానీ.. ఐపీఎల్ 2026లో ఢిల్లీ క్యాపిటల్స్ తరఫున కేవలం 10 వికెట్లు మాత్రమే తీసి నిరాశపరిచాడు. ఈ పేలవ ప్రదర్శన కారణంగానే అతను ఐర్లాండ్, ఇంగ్లాండ్ పర్యటనలకు భారత టీ20 జట్టులో చోటు కోల్పోవాల్సి వచ్చింది.
స్పిన్నర్లు కొత్తగా ఆలోచించాలి..
ఆఫ్ఘనిస్తాన్తో జరగబోయే మూడో వన్డేకు ముందు టెన్ డోషే విలేకరులతో మాట్లాడారు. ధర్మశాలలో జరిగిన తొలి మ్యాచ్కు దూరమైన కుల్దీప్, లక్నోలో జరిగిన రెండో వన్డేలో ఒక్క వికెట్ కూడా తీయలేకపోయాడు. దీనిపై కోచ్ స్పందిస్తూ.. “గత మ్యాచ్లో కుల్దీప్ బాగానే బౌలింగ్ చేశాడు. అతను ఇటీవలి కాలంలో టెస్టులతో పాటు పరిమిత ఓవర్ల క్రికెట్ కూడా నిరంతరాయంగా ఆడలేదు. కాబట్టి అతనిపై ఎలాంటి ఆందోళన లేదు. అయితే ప్రస్తుతం క్రికెట్ మారుతోంది, బ్యాటర్లు స్పిన్నర్లను సులువుగా ఎదుర్కొంటున్నారు. కాబట్టి స్పిన్నర్లు ఎప్పటికప్పుడు కొత్త ప్రయోగాలు చేయాల్సి ఉంటుంది.”
జట్టులో తీవ్రమైన పోటీ..
కుల్దీప్ ప్రతిభపై తమకు ఎలాంటి సందేహాలు లేవని, అయితే జట్టులో స్థానం కోసం చాలా మంది ఆటగాళ్లు క్యూలో ఉన్నారని డోషే గుర్తుచేశారు. స్పిన్ కోచ్ సాయిరాజ్ బహుతులేతో కలిసి కుల్దీప్ తన బౌలింగ్ను మరింత మెరుగుపరుచుకోవాలని సూచించారు. జట్టు సమతుల్యతను బట్టే ఎంపికలు ఉంటాయన్నారు. మరోవైపు.. చెన్నైలోని చెపాక్ మైదానంలో జరగనున్న మూడో వన్డే పిచ్ ఆరంభంలో సమంగా ఉన్నా, మ్యాచ్ సాగుతున్న కొద్దీ స్పిన్నర్లకు అనుకూలించే అవకాశం ఉంది. అలాగే.. మోకాలి గాయం నుంచి కోలుకున్న యువ వేగవంతమైన బౌలర్ హర్షిత్ రాణా సుదీర్ఘ విరామం తర్వాత భారత జట్టులోకి తిరిగి వచ్చాడు. శస్త్రచికిత్స కారణంగా ఐపీఎల్ 2026కు దూరమైన రాణా.. ఆఖరి వన్డేలో బరిలోకి దిగే అవకాశం ఉంది.
