బిగ్ బాస్ బ్యూటీ అషురెడ్డికి ఊహించని షాక్ తగిలింది. ఎన్నారై ధర్మేంద్ర ఫిర్యాదుతో మొదలైన ‘మోసం’ కేసు ఇప్పుడు కొత్త మలుపులు తిరుగుతోంది. పెళ్లి చేసుకుంటానని నమ్మించి దాదాపు రూ. 9.5 కోట్లు వసూలు చేశారన్న ఆరోపణలు ఇప్పటికే ఉండగా, తాజాగా లీకైన ఒక ఆడియో క్లిప్ సోషల్ మీడియాలో ప్రకంపనలు సృష్టిస్తోంది. బాధితుడు ధర్మేంద్రకు అషురెడ్డి వాట్సాప్ ద్వారా పంపినట్లు చెబుతున్న ఈ ఆడియోలో ఆసక్తికర విషయాలు ఉన్నాయి
‘మే నెల వరకు టైమ్ ఇస్తే కోటిన్నర రూపాయలు ఇస్తాను, మిగతావి తర్వాత చెల్లిస్తాను’ అని అషురెడ్డి చెప్పినట్లు వినిపిస్తోంది. ఇది చూస్తుంటే ఆమె డబ్బులు తీసుకున్న మాట వాస్తవమేనా అన్న అనుమానాలు బలపడుతున్నాయి. అయితే ఈ గొడవలో జ్యోతిష్కుడు వేణు స్వామి పేరు కూడా వినిపించడం సంచలనంగా మారింది.. ‘నీ వైపు నుంచి వేణు స్వామిని తీసుకురావచ్చు..’ అని ఆమె అనడం చూస్తుంటే, వీరి మధ్య జాతకాలు లేదా ఇతర సెటిల్మెంట్లలో ఆయన పాత్ర ఉందా అన్న చర్చ నడుస్తోంది. తన తరపున ఒక సీరియల్ నటి వస్తుందని, పెద్దల మధ్య సెటిల్ చేసుకుందామని ఆమె సూచించినట్లు ఆ ఆడియో ద్వారా తెలుస్తోంది.
మరోవైపు పోలీసులు ఇప్పటికే మోసం, కుట్ర సెక్షన్ల కింద కేసు నమోదు చేయడంతో అషురెడ్డి అప్రమత్తమయ్యారు. తనపై నమోదైన ఎఫ్.ఐ.ఆర్ (FIR)ను రద్దు చేయాలని కోరుతూ ఆమె తెలంగాణ హైకోర్టులో పిటిషన్ వేశారు. పోలీసులు తన వాదన వినకుండానే ఏకపక్షంగా కేసు పెట్టారని ఆమె వాదిస్తున్నారు. అయితే ఎన్నారై ధర్మేంద్ర మాత్రం వెనక్కి తగ్గడం లేదు. తన దగ్గర తీసుకున్న ప్రతి పైసా తిరిగి ఇవ్వాలని, తనను కేవలం అవసరం కోసం వాడుకున్నారని ఆయన ఆవేదన వ్యక్తం చేస్తున్నారు. కార్లు, ఫ్లాట్లు, బంగారం ఇలా అన్నిటికీ తన సొమ్మే వాడారని ఆయన ఆధారాలతో సహా పోలీసులను ఆశ్రయించారు.
