AP Local Body Elections Schedule: ఆంధ్రప్రదేశ్‌లో స్థానిక సంస్థల ఎన్నికల నిర్వహణపై ఉత్కంఠ నెలకొంది. మున్సిపాలిటీలు, నగరపాలక సంస్థలు, ఎంపీటీసీ, జడ్పీటీసీ, గ్రామ పంచాయతీ ఎన్నికలకు సంబంధించి షెడ్యూల్‌పై పలు వివరాలు ప్రచారంలో ఉన్నాయి. సమాచారం ప్రకారం, రేపు ఉదయం 11:30 గంటలకు మున్సిపల్‌, కార్పొరేషన్‌ ఎన్నికల నోటిఫికేషన్‌ విడుదలయ్యే అవకాశం ఉందని తెలుస్తోంది. అయితే, ఈ తేదీలు, షెడ్యూల్‌ వివరాలను రాష్ట్ర ఎన్నికల సంఘం అధికారికంగా ప్రకటించాల్సి ఉంది..
మున్సిపల్‌, కార్పొరేషన్‌ ఎన్నికలు.. అక్టోబర్‌ 28న పోలింగ్‌?
ప్రచారంలో ఉన్న సమాచారం ప్రకారం, మున్సిపాలిటీలు, నగరపాలక సంస్థల ఎన్నికల నోటిఫికేషన్‌ రేపు ఉదయం 11:30 గంటలకు విడుదలయ్యే అవకాశం ఉంది. ఈ నెల 16 నుంచి 18వ తేదీ వరకు అభ్యర్థుల నుంచి నామినేషన్లు స్వీకరించనున్నట్లు సమాచారం. నామినేషన్ల ఉపసంహరణకు ఈ నెల 21వ తేదీ వరకు గడువు ఉండవచ్చని తెలుస్తోంది. పోలింగ్‌ ఈ నెల 28న, ఓట్ల లెక్కింపు ఈ నెల 30న నిర్వహించే అవకాశం ఉందని ప్రచారం జరుగుతోంది.
ఎంపీటీసీ, జడ్పీటీసీ ఎన్నికలు.. నవంబర్‌ 3న పోలింగ్‌?
ఎంపీటీసీ, జడ్పీటీసీ ఎన్నికలకు సంబంధించి ఈ నెల 19న నోటిఫికేషన్‌ విడుదలయ్యే అవకాశం ఉందని ప్రచారం జరుగుతోంది. ఈ నెల 21 నుంచి 23వ తేదీ వరకు నామినేషన్ల స్వీకరణ, 27వ తేదీ వరకు నామినేషన్ల ఉపసంహరణకు గడువు ఉంటుందని సమాచారం. నవంబర్‌ 3న పోలింగ్‌, నవంబర్‌ 5న ఓట్ల లెక్కింపు నిర్వహించే అవకాశం ఉందని తెలుస్తోంది. అయితే, ఈ తేదీలపై అధికారిక ప్రకటన వెలువడాల్సి ఉంది.
మూడు దశల్లో గ్రామ పంచాయతీ ఎన్నికలు?
రాష్ట్రంలో గ్రామ పంచాయతీ ఎన్నికలను మూడు దశల్లో నిర్వహించే అవకాశం ఉందని సమాచారం. మొదటి దశ ఎన్నికలకు నవంబర్‌ 13న నోటిఫికేషన్‌ విడుదల చేసి, నవంబర్‌ 26న పోలింగ్‌ నిర్వహించనున్నట్లు ప్రచారం జరుగుతోంది. అదే రోజు ఓట్ల లెక్కింపు చేపట్టే అవకాశం ఉందని తెలుస్తోంది. రెండో దశ గ్రామ పంచాయతీ ఎన్నికలకు నవంబర్‌ 16న నోటిఫికేషన్‌ విడుదల చేసి, నవంబర్‌ 29న పోలింగ్‌ నిర్వహించే అవకాశం ఉందని సమాచారం. పోలింగ్‌ రోజే ఓట్ల లెక్కింపు చేపట్టనున్నట్లు తెలుస్తోంది. మూడో దశ గ్రామ పంచాయతీ ఎన్నికలకు నవంబర్‌ 19న నోటిఫికేషన్‌ విడుదల చేసి, డిసెంబర్‌ 2న పోలింగ్‌ నిర్వహించే అవకాశం ఉందని ప్రచారం జరుగుతోంది. ఈ దశలోనూ పోలింగ్‌ రోజే ఓట్ల లెక్కింపు చేపట్టనున్నట్లు సమాచారం.
అధికారిక షెడ్యూల్‌ కోసం ఎదురుచూపులు
స్థానిక సంస్థల ఎన్నికలకు సంబంధించి రాష్ట్ర ఎన్నికల సంఘం ఏర్పాట్లు చేస్తున్నట్లు వార్తలు వెలువడుతున్నాయి. మున్సిపాలిటీలు, కార్పొరేషన్లు, ఎంపీటీసీ, జడ్పీటీసీ, గ్రామ పంచాయతీలకు వేర్వేరుగా నోటిఫికేషన్లు విడుదల చేసే అవకాశం ఉంది. ఎన్నికల షెడ్యూల్‌ ప్రకటించిన తర్వాత నామినేషన్లు, పోలింగ్‌, కౌంటింగ్‌ తేదీలపై స్పష్టత రానుంది. అయితే, అక్టోబర్‌ 14న ఎన్నికల షెడ్యూల్‌ ప్రకటించే అవకాశం ఉందని తెలుస్తోంది.. రాష్ట్ర ఎన్నికల సంఘం అధికారిక షెడ్యూల్‌ విడుదల చేసిన తర్వాత పూర్తి వివరాలు తెలియనున్నాయి..
