AP Liquor Shops: ఆంధ్రప్రదేశ్లో 2026–27 సంవత్సరానికి ఏ4 మద్యం దుకాణాల రెన్యువల్ గడువును మరో రెండు రోజుల పాటు పొడిగించారు. మద్యం దుకాణాల యజమానుల విజ్ఞప్తి మేరకు ఈ నిర్ణయం తీసుకున్నట్లు అధికారులు తెలిపారు. దీంతో ఇప్పటికే ఉన్న దుకాణాలను రెన్యువల్ చేసుకునేందుకు ఈ నెల 23వ తేదీ వరకు అదనపు అవకాశం లభించింది. 2026–27 సంవత్సరానికి రాష్ట్రవ్యాప్తంగా మొత్తం 3,650 ఏ4 మద్యం దుకాణాలను నోటిఫై చేశారు. వీటిలో ఇప్పటివరకు 2,726 మద్యం దుకాణాల రెన్యువల్ పూర్తయింది. మిగిలిన దుకాణాల యజమానులు కూడా గడువులోగా రెన్యువల్ ప్రక్రియ పూర్తి చేసుకునేందుకు ఈ పొడిగింపును ఉపయోగించుకోవచ్చు. మద్యం దుకాణాల రెన్యువల్ ద్వారా ఇప్పటివరకు రాష్ట్రవ్యాప్తంగా రూ.676 కోట్ల ఆదాయం సమకూరినట్లు అధికారులు వెల్లడించారు. గడువు మరో రెండు రోజులు పొడిగించడంతో మిగిలిన దుకాణాల రెన్యువల్ ప్రక్రియ కూడా పూర్తయ్యే అవకాశం ఉంది.
కాగా, ఏపీ ప్రభుత్వం రాష్ట్రంలోని లిక్కర్ షాపుల లైసెన్స్కు సంబంధించి ప్రభుత్వం కీలక నిర్ణయం తీసుకున్న విషయం విదితమే.. 2026-27 ఎక్సైజ్ విధానంలో భాగంగా 3,736 మద్యం దుకాణాల లైసెన్సుల గడువును మరో ఏడాది పాటు పొడిగిస్తూ జీవో జారీ చేశారు.. అయితే, ఈ పొడిగింపు నిర్ణయం అక్టోబర్ 1వ తేదీ నుంచి అమల్లోకి రావాల్సి ఉంది.. కొత్త పాలసీలో భాగంగా ప్రభుత్వం నిఘా వ్యవస్థను కట్టుదిట్టం చేసేలా చర్యలకు పూనుకుంది.. ప్రతి లిక్కర్ షాప్లోనూ తప్పనిసరిగా 4 సీసీటీవీ కెమెరాలను ఏర్పాటు చేయాలని పేర్కొంది.. నిబంధనల ఉల్లంఘనలను నిశితంగా పరిశీలించేందుకు 24 గంటల పాటు పనిచేసే ఆర్టిఫిషియల్ ఇంటెలిజెన్స్ (ఏఐ) ఆధారిత పర్యవేక్షణ వ్యవస్థను అమలు చేయనుంది సర్కార్.. అయితే, రెన్యువల్ గడువు ఇవాళ్టితో ముగియగా.. మరో రెండు రోజులు ఆ గడువును పెంచుతూ నిర్ణయం తీసుకుంది ప్రభుత్వం..
