AP Government Employees Holiday: ఓవైపు స్థానిక ఎన్నికలు.. మరోవైపు.. దసరా పండుగ వేళ.. ప్రభుత్వ ఉద్యోగులకు గుడ్న్యూస్ చెప్పింది ఆంధ్రప్రదేశ్‌ ప్రభుత్వం.. ఎన్నికల విధుల్లో లేని ప్రభుత్వ ఉద్యోగులకు వచ్చే సోమవారం సెలవు ప్రకటిస్తూ ఉత్తర్వులు జారీ చేసింది. వరుసగా శని, ఆదివారాలు సెలవులు రావడంతో సోమవారాన్ని కూడా సెలవు దినంగా ప్రకటించాలని ప్రభుత్వం నిర్ణయించింది. ఇక, మంగళవారం దసరా సెలవు ఉండటంతో సోమవారం సెలవును కలుపుకొని ప్రభుత్వ ఉద్యోగులకు వరుసగా నాలుగు రోజుల పాటు సెలవులు లభించనున్నాయి. ఈ మేరకు సాధారణ పరిపాలన శాఖ ఉత్తర్వులు జారీ చేసింది. అయితే, ఈ సెలవు ఎన్నికల విధుల్లో లేని ప్రభుత్వ ఉద్యోగులకు మాత్రమే వర్తించనుంది.
సోమవారం సెలవుకు బదులుగా వచ్చే నెల నవంబర్ 14వ తేదీ రెండో శనివారాన్ని పని దినంగా ప్రకటిస్తూ ప్రభుత్వం ఉత్తర్వుల్లో పేర్కొంది. దీంతో ఉద్యోగులు ప్రకటించిన ప్రత్యామ్నాయ పని దినాన్ని దృష్టిలో ఉంచుకొని తమ విధులను నిర్వహించాల్సి ఉంటుంది. ప్రభుత్వ నిర్ణయంపై ఉద్యోగ సంఘాల నేతలు హర్షం వ్యక్తం చేశారు. ఉద్యోగులకు సెలవు ప్రకటించిన సీఎం చంద్రబాబు నాయుడుకు ధన్యవాదాలు తెలిపారు. వరుస సెలవులతో పండుగను కుటుంబ సభ్యులతో గడిపేందుకు అవకాశం కల్పించిన ప్రభుత్వ నిర్ణయాన్ని స్వాగతించారు.
