Vi: వోడాఫోన్ ఐడియా (Vi) ప్రీపెయిడ్ వినియోగదారుల కోసం కొత్త ఫ్యామిలీ ప్లాన్‌ను తీసుకొచ్చింది. ఇందులో ఒక ప్రైమరీ సభ్యుడితో పాటు మరో ముగ్గురు సభ్యులు కలిపి గరిష్ఠంగా నలుగురు ఫ్యామిలీ గ్రూప్‌లో చేరవచ్చు. ప్రతి ఒక్కరూ తమ సొంత ప్లాన్, వ్యాలిడిటీని కొనసాగిస్తూనే 500MB చొప్పున డేటాను షేర్ చేసుకోవచ్చు.
ఈ ఫ్యామిలీ గ్రూప్‌ను Vi యాప్ ద్వారా క్రియేట్ చేసుకోవచ్చు. ముఖ్యంగా వేర్వేరు టెలికాం సర్కిళ్లలో ఉన్న కుటుంబ సభ్యులు కూడా ఈ డేటా షేరింగ్ సదుపాయాన్ని ఉపయోగించుకోవచ్చు. దీంతో డేటా అయిపోతున్న సమయంలో ఇతర కుటుంబ సభ్యుల నుంచి డేటా పొందే అవకాశం ఉంటుంది. ఆన్‌లైన్ క్లాసులు, వీడియో కాల్స్, మ్యాప్స్ లేదా అత్యవసర యాప్స్ వినియోగించే సమయంలో ఈ ఫీచర్ ఉపయోగపడుతుందని Vi తెలిపింది.
ఒక్కసారి 500MB డేటాను మాత్రమే షేర్ చేసుకునే అవకాశం ఉంటుంది. అయితే డేటా ఎన్ని సార్లు షేర్ చేసుకోవచ్చనే వివరాలను కంపెనీ వెల్లడించలేదు. డేటా షేరింగ్‌తో పాటు Vi యాప్ ద్వారా చేసే ప్రతి రీచార్జ్‌పై కుటుంబంలోని ప్రతి సభ్యుడికి 10% వరకు డిస్కౌంట్ లభిస్తుంది. ఈ ఫ్యామిలీ ప్లాన్‌ను ప్రచారం చేసేందుకు Vi ప్రత్యేక క్యాంపెయిన్‌ను కూడా ప్రారంభించింది.
