Ukraine War: రష్యా-ఉక్రెయిన్ యుద్ధంలో కీలక పరిణామం సంభవించింది. రెండు దేశాల మధ్య తక్షణమే అమలులోకి వచ్చేలా ‘ఎనర్జీ సీజ్-ఫైర్’ ఒప్పందం కుదిరిందని అమెరికా అధ్యక్షుడు డొనాల్డ్ ట్రంప్ ప్రకటించారు. ట్రంప్ ఆదివారం తన సోషల్ మీడియా వేదికగా ట్రూత్ సోషల్‌లో ఈ ప్రకటన చేశారు. రష్యా, ఉక్రెయిన్ మధ్య ఎనర్జీ రంగానికి సంబంధించిన కాల్పులు విరమణ తక్షణమే అమల్లోకి వస్తుందని పేర్కొన్నారు. ఇరు దేశాలు ఈ ఒప్పందానికి అంగీకరించాయి, దీనిని ఉల్లంఘించవద్దని ట్రంప్ హెచ్చరించారు. అయితే, ఈ ఒప్పందం ఎంత కాలం అమలులో ఉంటుంది అనే దానిపై స్పష్టత లేదు.
ట్రంప్ ప్రకటనపై ఉక్రెయిన్ అధ్యక్షుడు వొలోడిమిర్ జెలెన్ స్కీ స్పందిస్తూ.. ఇది తనకు కొత్త విషయమని అన్నారు. దీనికి ముందు ఆయన మాట్లాడుతూ.. రష్యా రిఫైనరీలపై దాడులు చేయమని, కానీ ముందుగా తమ ఎనర్జీ మౌలిక సదుపాయాలపై రష్యా దాడులు నిలిపేయాలని డిమాండ్ చేశారు. ఇదే సమయంలో రష్యా అధ్యక్షుడు పుతిన్‌తో మాట్లాడి కనీసం 2 నెలల పాటు సంపూర్ణ కాల్పుల విరమణకు అంగీకరించేలా ట్రంప్‌ను జెలెన్ స్కీ కోరారు. ఈ సమయంలో ఉక్రెయిన్ ఎన్నికలు నిర్వహించేందుకు ఏర్పాట్లు చేసుకుంటామని చెప్పారు.
ఇదిలా ఉంటే, తాజా పరిణామాలు ఉక్రెయిన్, అమెరికా మధ్య తీవ్ర విభేదాలకు కారణమవుతున్నాయి. రష్యా, తమపై దాడులు చేసేలా అమెరికా ప్రోత్సహిస్తోందని జెలెన్ స్కీ ఆరోపించారు. ఇదే సమయంలో ఉక్రెయిన్‌కు కొత్త అధ్యక్షుడు రావాలని ట్రంప్ కోరడం సంచలనంగా మారింది. రష్యాతో శాంతి ఒప్పందం కుదుర్చుకోవడంలో జెలెన్ స్కీ విఫలమయ్యారని విమర్శించారు. దీనికి ప్రతిగా తమ దేశ నాయకుడిని ఎన్నుకునే హక్కు ఉక్రెయిన్ ప్రజలకే ఉందని అన్నారు. రష్యాపై ఒత్తిడి తెచ్చి యుద్ధాన్ని ముగించేలా అమెరికా, యూరప్ పనిచేయాలని కోరారు.
